टरौलीमा निःशुल्क पाठेघर तथा स्तन क्यान्सर परीक्षण शिविर सम्पन्न, १२० महिलाले सेवा लिए

बुधवार बिहान १० बजेदेखि दिउँसो ३ बजेसम्म सञ्चालन गरिएको शिविरमा १२० जना महिलाले निःशुल्क स्वास्थ्य सेवा लिएका थिए। शिविरमार्फत महिलाहरूको पाठेघरको मुखको क्यान्सर (भि.आई.ए.) परीक्षण, स्तन क्यान्सर परीक्षण तथा आवश्यक स्वास्थ्य परामर्श प्रदान गरिएको थियो।

नगर स्वास्थ्य केन्द्र प्रमुख गोविन्द शर्माका अनुसार ५५ जनाको पाठेघरको मुखको क्यान्सर (भि.आई.ए.) परीक्षण गरिएकोमा ५४ जनाको रिपोर्ट सामान्य आएको छ भने १ जनालाई थप परीक्षण तथा उपचारका लागि रिफर गरिएको छ। त्यसैगरी ६५ जनाको स्तन क्यान्सर परीक्षण गरिएकोमा ६ जनामा थप परीक्षण आवश्यक देखिएकाले उपचारका लागि रिफर गरिएको केन्द्र प्रमुख शर्माले वताए।

कार्यक्रमका प्रमुख अतिथि रत्ननगर नगरपालिका वडा नं. ५ का वडाध्यक्ष तथा स्वास्थ्य केन्द्र व्यवस्थापन समितिका अध्यक्ष बालकृष्ण चापागाईंले यस्ता स्वास्थ्य शिविरले महिलाहरूमा स्वास्थ्य सचेतना बढाउनुका साथै क्यान्सरजस्ता जटिल रोगको समयमै पहिचान गर्न महत्त्वपूर्ण योगदान पुग्ने बताए। उनले स्थानीय सरकार नागरिकको स्वास्थ्यलाई पहिलो प्राथमिकतामा राखेर आगामी दिनमा पनि यस्ता प्रभावकारी कार्यक्रमलाई निरन्तरता दिने प्रतिबद्धता व्यक्त गरे। साथै उनले महिलाहरूलाई नियमित स्वास्थ्य परीक्षण गराई आफ्नो स्वास्थ्यप्रति सचेत रहन वडाध्यक्ष चापागाईले आग्रह गरे।

स्वास्थ्य केन्द्र प्रमुख गोविन्द शर्माले पाठेघरको मुखको क्यान्सर र स्तन क्यान्सर समयमै पहिचान भए उपचार सफल हुने सम्भावना धेरै रहने भएकाले प्रत्येक महिलाले नियमित रूपमा स्वास्थ्य परीक्षण गराउनुपर्नेमा जोड दिए। उनले शिविरमा सहभागी भई सेवा लिने सबै महिलाप्रति धन्यवाद व्यक्त गर्दै थप परीक्षणका लागि रिफर गरिएका सेवाग्राहीलाई समयमै अस्पतालमा सम्पर्क गरी उपचार प्रक्रिया अघि बढाउन आग्रह गरे।

शिविरमा वडा सदस्य निलु शर्मा खतिवडा , ज्ञानस सुनार लगायत जनप्रतिनिधि, स्वास्थ्यकर्मी तथा स्थानीय महिलाहरूको उल्लेखनीय उपस्थिति रहेको थियो। कार्यक्रमले महिलाहरूमा क्यान्सरसम्बन्धी सचेतना अभिवृद्धि गर्नुका साथै प्रारम्भिक अवस्थामै रोग पहिचान गरी उपचारमा पहुँच बढाउन महत्त्वपूर्ण योगदान पुर्‍याएको आयोजकले जनाएको छ।