जंगलबाट ल्याएको भ्याकुर खाँदा बागलुङमा एक जनाको मृत्यु, ८ जना अस्पताल भर्ना

बागलुङ । बडिगाड गाउँपालिकामा जंगलबाट ल्याइएको जंगली भ्याकुर सेवन गर्दा एक जनाको मृत्यु भएको छ भने आठ जना बिरामी परेका छन् ।

इलाका प्रहरी कार्यालय बुर्तिवाङका प्रमुख प्रहरी निरीक्षक तिलक मानन्धरका अनुसार बडिगाड गाउँपालिका–५ दाग घर भई खार बस्ने ७२ वर्षीया फिरमकुमारी घिमिरेको भ्याकुर सेवनपछि मृत्यु भएको हो । दीर्घरोगीसमेत रहेकी घिमिरेको घरमै ज्यान गएको प्रहरीले जनाएको छ ।

भ्याकुर खाएर बिरामी पर्नेमा ५५ वर्षीया दुरपती कामी, ५५ वर्षीय विष्णु घिमिरे, २३ वर्षीया शारदा न्यौपाने, ४३ वर्षीय सुरेन्द्र विक, ६३ वर्षीय भोजराज घिमिरे, ६२ वर्षीया पुतली घिमिरे, ६५ वर्षीय खिमानन्द घिमिरे र १४ वर्षीय अबिसन घिमिरे रहेका छन् । बिरामीमध्ये दुरपती कामीको अवस्था गम्भीर रहेको बताइएको छ ।

बिरामी सबैको अहिले बुर्तिबाङ जिल्ला अस्पतालमा उपचार भइरहेको अस्पतालकी सूचना अधिकारी पार्वती अर्यालले जानकारी दिइन् । उनका अनुसार बिरामीहरूमा चक्कर लाग्ने, हातखुट्टा लुलो हुने तथा वान्ता हुने लक्षण देखिएको छ ।

स्थानीयका अनुसार उनीहरू आइतबार नियमितजस्तै निगुरो टिप्न जंगल गएका थिए । जंगलबाट ल्याएको भ्याकुर खाजाका रूपमा सेवन गरेपछि एक्कासि बिरामी परेका हुन् ।