जनमतलाई जनताको हितमा प्रयोग गर्न रास्वपालाई ज्ञवालीको सुझाव

---

चितवन । नेकपा (एमाले) का नेता प्रदीप ज्ञवाली ले राष्ट्रिय स्वतन्त्र पार्टी (रास्वपा)लाई देश र लोकतन्त्रलाई थप सुदृढ बनाउने ऐतिहासिक अवसर र जिम्मेवारी प्राप्त भएको बताएका छन्।

राष्ट्रिय स्वतन्त्र पार्टी को प्रथम राष्ट्रिय महाधिवेशनलाई शुभकामना दिँदै नेता ज्ञवालीले महाधिवेशनले केवल नयाँ नेतृत्व चयन गर्ने प्रक्रियामा सीमित नभई पार्टीको स्पष्ट राजनीतिक दृष्टिकोण, सिद्धान्त र भावी मार्गचित्र तय गर्नुपर्नेमा जोड दिए।

उनले रास्वपा राष्ट्रिय राजनीतिमा कुन स्थानमा उभिन्छ भन्नेभन्दा पनि संविधानवाद, विधिको शासन, मौलिक अधिकार, सामाजिक न्याय र उत्तरदायी राज्यको अवधारणालाई कसरी अघि बढाउँछ भन्ने विषय महत्वपूर्ण हुने बताए।

छोटो समयमै रास्वपाले हासिल गरेको जनसमर्थनलाई उल्लेख गर्दै ज्ञवालीले जनादेश प्राप्त गर्नु जत्तिकै त्यसको सही उपयोग गर्नु महत्वपूर्ण हुने धारणा राखे। इतिहासमा जनमतको सदुपयोग र दुरुपयोगका अनेक उदाहरण रहेको उल्लेख गर्दै उनले जनताको विश्वासलाई परिणाममुखी काममार्फत स्थापित गर्नुपर्ने सुझाव दिए।

लोकतान्त्रिक व्यवस्थामा ‘चेक एन्ड ब्यालेन्स’ को महत्व औँल्याउँदै उनले न्यायपालिका, राष्ट्रपति र संसद् जस्ता संवैधानिक संस्थाहरू बलियो रहनुपर्ने बताए। साथै जनताका आलोचनात्मक आवाजलाई लोकतन्त्रको महत्वपूर्ण आधारका रूपमा सम्मान गर्नुपर्ने उनको भनाइ थियो।

रास्वपाभित्र रहेको परिवर्तनको उत्साह र काम गर्ने इच्छाशक्तिसँगै आवश्यक संयम, कानुनी प्रक्रिया र संस्थागत सन्तुलन कायम रहोस् भन्ने शुभेच्छा व्यक्त गर्दै नेता ज्ञवालीले महाधिवेशनको पूर्ण सफलताको कामना गरे।