‘रास्वपाले प्रतिशोध होइन, सहकार्यको राजनीति गर्छ’ : रवि लामिछाने

---

चितवन । राष्ट्रिय स्वतन्त्र पार्टी (रास्वपा)का सभापति रवि लामिछाने ले आफ्नो पार्टीले प्रतिशोधको राजनीति नगरी सहकार्य, एकता र जनहितको राजनीतिलाई प्राथमिकता दिने बताएका छन्।

चितवनको भरतपुरमा आयोजित रास्वपाको प्रथम राष्ट्रिय महाधिवेशन उद्घाटन समारोहलाई सम्बोधन गर्दै उनले रास्वपाले जनताबाट प्राप्त विश्वासलाई जिम्मेवारीपूर्वक प्रयोग गर्ने र कसैप्रति पनि प्रतिशोधको भावना नराख्ने स्पष्ट पारे। राजनीतिक दलहरूबीच देखिएका वैमनस्यता र कटुताको अन्त्य गर्दै सहकार्य र सहमतिका आधारमा देश र जनताको पक्षमा काम गर्नुपर्ने उनको भनाइ थियो।

सभापति लामिछानेले पार्टीभित्र गुट–उपगुटको अभ्यास हुन नदिने दृढता व्यक्त गर्दै महाधिवेशनमार्फत एकताको सशक्त सन्देश प्रवाह गरिने बताए। पुराना राजनीतिक दलहरूमा देखिएका आन्तरिक विभाजनबाट शिक्षा लिनुपर्ने उल्लेख गर्दै उनले गुटरहित संगठन निर्माण गर्न सके रास्वपालाई कुनै पनि शक्तिले कमजोर बनाउन नसक्ने दाबी गरे।

“रास्वपा लड्छ भने आफ्नै कमजोरीका कारण लड्छ, बाहिरबाट कसैले ढाल्न सक्दैन,” उनले भने, “गुट र उपगुटले दिने फल विषालु हुन्छ। त्यसैले आज हामी कस्तो बीउ रोप्ने भन्ने महत्वपूर्ण मोडमा उभिएका छौँ।”

रास्वपा अब देशको साझा राजनीतिक मञ्चका रूपमा स्थापित हुँदै गएको दाबी गर्दै उनले पछिल्लो समय विभिन्न पेशा, व्यवसाय र गैरराजनीतिक क्षेत्रका व्यक्तिहरू पनि राजनीतिप्रति आकर्षित हुन थालेको बताए। यसलाई नेपाली राजनीतिमा सकारात्मक परिवर्तनको संकेतका रूपमा उनले व्याख्या गरे।

लामिछानेले नेपाली राजनीतिलाई स्वस्थ र प्रभावकारी बनाउन प्रमुख दलहरू पनि आत्मसमीक्षामा जुट्नुपर्ने धारणा राखे। उनले नेपाली कांग्रेस र नेकपा एमाले भित्र देखिएका समस्याहरू समाधान हुन नसके त्यसको असर समग्र देशले बेहोर्नुपर्ने चेतावनी दिए।

“राष्ट्रिय राजनीति राम्रो हुन रास्वपा मात्रै राम्रो भएर पुग्दैन,” उनले भने, “कांग्रेस र एमाले पनि सुधारिनुपर्छ। ती दलभित्रका समस्या समाधान भएनन् भने त्यसको मूल्य देशले चुकाउनुपर्छ।”

सरकार सञ्चालनबारे बोल्दै सभापति लामिछानेले पूर्वसहमतिअनुसार नै सरकार अघि बढिरहेको र प्रधानमन्त्री वालेन शाह नेतृत्वको सरकारले तय गरिएका लक्ष्यअनुसार काम गरिरहेको बताए। उनले आफू र प्रधानमन्त्रीबीचको सम्बन्धलाई फुटबल खेलसँग तुलना गर्दै सरकारको सफलता सामूहिक प्रयासबाट सम्भव हुने उल्लेख गरे।

रास्वपाको प्रथम महाधिवेशनले पार्टीको भावी दिशा, नीति र संगठनात्मक संरचना तय गर्ने विश्वास व्यक्त गर्दै उनले एकता, अनुशासन र जनविश्वासलाई पार्टीको सबैभन्दा ठूलो शक्ति बनाउने प्रतिबद्धता जनाए।